O pasado venres 10 de abril, o alumnado dende Educación Infantil ata 4º de Primaria participou nunha actividade moi especial, enmarcada no proxecto de lectura impulsado pola ANPA do centro.
Tivemos a inmensa sorte de recibir a visita da autora Beatriz Cabaleiro, quen compartiu coas nenas e nenos o seu conto Clover, unha porquiña diferente. Con esta actividade, queremos destacar o valor fundamental que ten a lectura no desenvolvemento dos nosos cativos. Os libros non só abren a porta á imaxinación e á creatividade, senón que son unha ferramenta indispensable para educar en valores, axudándolles a comprender o mundo e a xestionar as súas emocións. A través desta fantástica historia, o alumnado reflexionou sobre a importancia de respectar as diferenzas, fomentar a empatía e rexeitar calquera forma de acoso escolar.
Ademais da gran aprendizaxe, o mellor de todo foi ver o ben que o pasaron os nenos e nenas! Durante a sesión, ríronse, gozaron moitísimo de cada páxina e participaron con desbordante entusiasmo. Expresaron con alegría e naturalidade as súas ideas, compartindo entre todos como cren que se pode ser un bo compañeiro. Foi unha xornada tremendamente divertida e chea de sorrisos.
Como parte da actividade, realizaron debuxos sobre o compañeirismo cos que se elaborará un libro colectivo viaxeiro, así como un gran mural que reflectirá o compromiso de todos co respecto e a convivencia.
Dende a ANPA animámosvos a continuar esta viaxe na casa. Fomentade o hábito da lectura compartindo contos con eles, e aproveitade esas historias para falar sobre a importancia de coidar aos demais, respectar as diferenzas e axudar a quen o precise.
"Escola e familias, xuntos para que ningún neno ou nena sinta soidade."
ANPA CEIP Mestre Valverde Mayo